ភ្នំពេញ៖ ករណីឃាត់ខ្លួនលើលោកឧកញ៉ា អ៊ុត ធី និងលោក មួង ឃីម កាលពីថ្ងៃទី១០ ខែវិច្ឆិកាម្សិលមិញ សាលាដំបូងរាជធានីភ្នំពេញនឹងបន្តចំណាត់ការនីតិវិធីនៅថ្ងៃចន្ទ ទី១១ ខែវិច្ឆិកានេះ។ អង្គភាពប្រឆាំងអំពើពុករលួយ (ACU) បានសម្រេចឃាត់ខ្លួនលោក មួង ឃីម និងលោកឧកញ៉ា អ៊ុត ធី ដែលគេស្គាល់ថារកស៊ីវាយថ្ម និងធ្វើផ្លូវ។
គួរបញ្ជាក់ថា អង្គភាពប្រឆាំងអំពើពុករលួយ (ACU) បានឃាត់ខ្លួនលោកឧកញ៉ា អ៊ុត ធី និងលោក មួង ឃីម ដោយគេនៅមិនទាន់បញ្ជាក់ច្បាស់អំពីបទល្មើសដែលនាំឱ្យមានការចាប់ខ្លួនបុគ្គលទាំង២នាក់នេះទេ តែការឃាត់ខ្លួននេះ ទំនងជាធ្វើឡើងក្រោយមានការបែកធ្លាយលិខិតមួយដែលបង្ហាញថា បុគ្គលទាំងពីរនាក់ខាងលើជាប់ពាក់ព័ន្ធក្នុងអំពើករណីឆបោក រួមគ្នាជាមួយលោក លី សាម៉េត ហៅគ្រូមា, លោក ដួង តារា និងលោក ឡាច សំរោង។
សូមបញ្ជាក់ថា លោកឧកញ៉ា អ៊ុត ធី ត្រូវគេស្គាល់ថាជាអ្នករកស៊ីវាយថ្ម និងសាងសង់ផ្លូវថ្នល់ និងដោយឡែក លោក មួង ឃីម ជាអតីតមន្រ្តីនគរបាលចូលនិវត្តន៍ នៃនាយកដ្ឋានកណ្តាលនគរបាលយុត្តិធម៌៕
